बागमती प्रदेश विश्वविद्यालयको आधिकारिक वेभसाइट शुभारम्भ भएको यस महत्त्वपूर्ण अवसरमा म विश्वविद्यालय परिवारलाई हार्दिक बधाई तथा शुभकामना व्यक्त गर्न चाहन्छु । आधुनिक प्रविधिको युगमा शिक्षालाई डिजिटल माध्यमबाट अझ प्रभावकारी बनाउने दिशामा यो कदम निकै महत्त्वपूर्ण हुनेछ भन्ने विश्वास लिएको छु ।
नेपालका विद्यार्थीहरूको आकांक्षा अनुरूप, यस विश्वविद्यालयले उत्कृष्ट, समावेशी, रोजगारमूलक, तथा गुणस्तरीय उच्च शिक्षा प्रदान गर्न सफल होस् भन्ने कामना गर्दछ । साथै, आगामी शैक्षिक सत्रदेखि यस विश्वविद्यालयले १३ वटा पाठ्यक्रम निर्माण गरी पठनपाठन गर्न लागेको खबर सुन्न पाउँदा अत्यन्त हर्ष लागेको छ । गुणस्तरीय, समावेशी र रोजगारमूलक उच्च शिक्षा प्रदान गर्ने लक्ष्यसहित अघि बढेको यस विश्वविद्यालयले विद्यार्थीहरूका लागि नयाँ अवसर सिर्जना गर्नेछ भन्ने अपेक्षा गर्दछु । पठनपाठनको औपचारिक शुभारम्भ गरी ज्ञान, अनुसन्धान, नवप्रवर्तन तथा व्यावसायिक शिक्षाको क्षेत्रमा महत्त्वपूर्ण योगदान दिन सक्ने छ भन्ने विश्वास लिएको छु ।
शिक्षा सबै नागरिकको मौलिक अधिकार हो र यस विश्वविद्यालयको स्थापनाले विद्यार्थीहरूलाई उच्च शिक्षामा पहुँच पुयाउन महत्त्वपूर्ण भूमिका खेल्नेछ । यसै सन्दर्भमा, विश्वविद्यालयको अभिवृद्धिका लागि प्रदेश सरकार सधैं सहकार्यका लागि तत्पर छ भन्ने प्रतिवद्धता व्यक्त गर्न चाहन्छु ।
बागमती प्रदेश विश्वविद्यालयको निरन्तर प्रगति तथा सफलताको कामना गर्दै सम्पूर्ण विश्वविद्यालय परिवार तथा सरोकारवालाहरूलाई हार्दिक शुभकामना व्यक्त गर्दछु ।
धन्यवाद !
हरि प्रभा खड्गी (श्रेष्ठ)
माननीय सामाजिक विकास मन्त्री